Macet nuk mjaullijnë gjithmonë pa arsye. Një studim i ri shkencor ka zbuluar se ato shpesh përdorin mjaullimën për të komunikuar me njerëzit, veçanërisht kur kanë nevojë për ndihmë.
Studiuesit nga Universiteti i São Paulos në Brazil zhvilluan një eksperiment me 38 mace, të cilave u vendosën ushqime të preferuara brenda kutive që nuk mund t’i hapnin vetë.
Rezultatet ishin interesante: kur në dhomë ndodhej një person, macet mjaullinë gjithsej 86 herë, ndërsa kur ishin vetëm, u regjistruan vetëm 20 mjaullima.
Kjo tregon se macet e ndryshojnë sjelljen e tyre kur kanë pranë njerëz, duke përdorur tingujt për të tërhequr vëmendjen dhe për të kërkuar ndihmë.
Studiuesit vunë re gjithashtu se macet shpesh shikonin herë njeriun e herë kutinë me ushqim, sikur dëshironin t’i tregonin problemin.
Megjithatë, shkencëtarët theksojnë se kjo nuk do të thotë se çdo mjaullimë është një kërkesë e qëllimshme. Macet mund të mjaullijnë edhe për ushqim, përkëdhelje apo për t’u hapur dera.
Studimi, i publikuar në revistën shkencore Animal Behaviour, sugjeron se macet kanë zhvilluar mënyra të veçanta komunikimi me njerëzit gjatë bashkëjetesës me ta.