Edhe pse larja e rregullt e dhëmbëve është thelbësore për ruajtjen e shëndetit oral, disa ushqime dhe pije që konsumojmë çdo ditë mund të ndikojnë në ngjyrën e tyre. Stomatologët paralajmërojnë se disa produkte përmbajnë pigmente ose acide që me kalimin e kohës mund të shkaktojnë njolla dhe zverdhje të dhëmbëve.
Ekspertët kujtojnë se dhëmbët nuk janë natyrshëm plotësisht të bardhë dhe se me kalimin e viteve zmalti konsumohet gradualisht, duke e bërë më të dukshme dentinën, e cila ka një ngjyrë më të verdhë. Megjithatë, disa ushqime dhe pije mund ta përshpejtojnë këtë proces.
Frutat e errëta
Boronicat, manaferrat dhe mjedrat janë të pasura me antioksidantë dhe shumë të dobishme për shëndetin, por pigmentet e tyre të forta mund të lënë njolla sipërfaqësore në dhëmbë.
Stomatologët rekomandojnë shpëlarjen e gojës me ujë pas konsumimit të këtyre frutave për të larguar mbetjet e lëngjeve që mund të ndikojnë në ngjyrën e dhëmbëve.
Vera
Vera e kuqe konsiderohet një nga shkaktarët më të njohur të njollave dentare. Pigmentet dhe taninët që ajo përmban mund të ngjiten në sipërfaqen e smaltit dhe të shkaktojnë ndryshim të ngjyrës.
Edhe vera e bardhë, ndonëse nuk lë njolla të errëta, përmban acide që mund ta bëjnë smaltin më të ndjeshëm ndaj pigmentimit.
Keçapi
Keçapi dhe salcat e ngjashme me ngjyrë intensive mund të kontribuojnë në krijimin e njollave në sipërfaqen e dhëmbëve. Për këtë arsye, specialistët rekomandojnë kujdes të shtuar në higjienën orale pas konsumimit të tyre.
Pijet e gazuara
Përveç sasisë së lartë të sheqerit, pijet e gazuara përmbajnë edhe acide që mund të dëmtojnë smaltin e dhëmbëve. Kur smalti hollohet, dhëmbët mund të duken më të verdhë dhe më të ndjeshëm ndaj pigmentimit.
Përdorimi i një pipëze mund të ndihmojë në zvogëlimin e kontaktit të drejtpërdrejtë të pijeve me sipërfaqen e dhëmbëve.