Në detin Adriatik, pranë ishullit Krk në Kroaci, ndodhet Košljuni, një ishull i vogël që tërheq vëmendjen për qetësinë, natyrën dhe historinë e tij të pasur. Në këtë ishull jetojnë vetëm katër persona, të gjithë pjesëtarë të komunitetit françeskan.
Košljuni ndodhet rreth 750 metra larg bregdetit të qytezës Punat dhe mund të arrihet me varkë për afërsisht dhjetë minuta. Ishulli është i mbuluar me pyje të dendura dhe ka mbi 540 lloje bimësh, duke qenë një zonë e mbrojtur natyrore.
Në qendër të tij ndodhet një manastir historik françeskan, i cili ruan rreth 30 mijë libra, dorëshkrime të rralla, vepra arti dhe koleksione muzeale që dëshmojnë historinë dhe kulturën e rajonit.
Ajo që e bën Košljunin të veçantë është mungesa e plotë e restoranteve, kafeneve dhe ambienteve të zakonshme turistike. Edhe larja në det është e ndaluar, pasi ishulli ruan karakterin e tij fetar dhe natyror.
Vizitorët mund të shëtisin nëpër pyje, të vizitojnë manastirin dhe muzetë, si dhe të shijojnë qetësinë e këtij vendi të pazakontë. Për një vizitë të plotë rekomandohen rreth dy orë.
Košljuni mbetet një destinacion i veçantë për ata që kërkojnë një përvojë ndryshe, larg turizmit masiv dhe zhurmës së përditshme.