Elizabeth Taylor ishte më shumë se një aktore, ajo ishte fenomen. E lindur më 27 shkurt 1932 në Hampstead të Londrës, ajo u rrit mes Britanisë së Madhe dhe Shteteve të Bashkuara, derisa familja e saj u vendos në Los Anxhelos në prag të Luftës së Dytë Botërore. Që në moshë të vogël, Taylor hyri në botën e filmit dhe shumë shpejt u kthye në një nga fytyrat më të njohura të ekranit.
Fama e saj shpërtheu që në moshën 12-vjeçare me filmin National Velvet (1944), duke e shndërruar në një yll të ri të Hollivudit. Gjatë viteve ’50 ajo kaloi me sukses nga rolet e fëmijëve në role dramatike madhore, duke shkëlqyer në filma si A Place in the Sun, Giant dhe Cat on a Hot Tin Roof.
Në vitin 1960 fitoi Oskarin e parë për filmin Butterfield 8, ndërsa të dytin e mori në vitin 1966 për rolin e saj legjendar në Who’s Afraid of Virginia Woolf?. Por ishte filmi Cleopatra (1963) që e bëri histori: Elizabeth Taylor u bë aktorja e parë që u pagua një milion dollarë për një rol – një shifër marramendëse për kohën.
Gjatë xhirimeve të Cleopatra, ajo nisi një lidhje me Richard Burton, një romancë që pushtoi titujt e mediave ndërkombëtare. Vatikani e dënoi publikisht lidhjen e tyre, ndërsa shtypi e quajti Taylor “skandali i shekullit”. Megjithatë, ajo e përballoi me ironi dhe vetëbesim, duke mos lejuar që polemikat ta zbehnin karrierën e saj.
Taylor u martua tetë herë me shtatë burra dhe jeta e saj private ishte po aq e komentuar sa filmat e saj. Ajo ishte e njohur për luksin, sidomos për koleksionin e jashtëzakonshëm të bizhuterive, që më vonë u shit për mbi 100 milionë dollarë në ankand.
Në vitet ’80, Elizabeth Taylor u angazhua fuqishëm në luftën kundër HIV/AIDS-it, duke qenë ndër figurat e para publike që folën hapur për këtë çështje. Ajo kontribuoi në themelimin e fondacioneve të rëndësishme dhe u nderua për punën e saj humanitare me çmime prestigjioze ndërkombëtare.
Elizabeth Taylor ndërroi jetë më 23 mars 2011 në Los Anxhelos, në moshën 79-vjeçare. Sot ajo mbetet simbol i glamurit klasik të Holivudit, por edhe shembull i një ylli që e përdori famën për të bërë ndryshim në botë.