Të mësosh diçka të re mund të ndryshojë aktivitetin e trurit që pas një seance të vetme. Këtë kanë vërejtur studiuesit e Universitetit të Nottinghamit, duke ndjekur persona që po mësonin të luanin në violinë.
Në studim morën pjesë 22 fillestarë. Ata provuan të luanin një melodi të thjeshtë përpara dhe pas një mësimi, ndërsa një skaner në formë helmete regjistronte aktivitetin e trurit pa ua penguar lëvizjet.
Pas mësimit, shkencëtarët zbuluan ndryshime në valët cerebrale beta, të cilat lidhen me kontrollin e lëvizjeve dhe procesin e të mësuarit. Pjesëmarrësit që u përmirësuan më shumë në violinë treguan edhe ndryshimet më të mëdha në këto sinjale.
Sipas studiuesve, truri parashikon rezultatin e veprimeve tona. Kur nota që dëgjojmë ndryshon nga ajo që prisnim, kjo mospërputhje mund të na ndihmojë të korrigjojmë lëvizjen dhe të mësojmë.
Gjetjet ndihmojnë të kuptohet si përvetësojmë aftësi të reja. Megjithatë, studimi i vogël nuk provon se ndryshimet e regjistruara shkaktuan përmirësimin dhe as se mësimet e muzikës parandalojnë demencën. Kjo mbetet një fushë për kërkime të mëtejshme.