Njoftimi i tarifave të reja nga Donald Trumpi javën e kaluar po shkakton dhimbje koke në Cupertino, selia në Kaliforni e gjigantit Apple.
Prodhuesi më i madh në botë i pajisjeve elektronike të konsumit, i cili mbështetet shumë në Azi për të prodhuar iPhone, Mac, AirPods dhe iPad, do të goditet rëndë nga rritja e barrierave të importit të shpallura nga presidenti amerikan.
Produkti kryesor i Apple është “I projektuar në Kaliforni” por “i montuar në Kinë”.
Sipas Evercore ISI, 80% e kapacitetit të prodhimit të iPhone është në Kinë dhe 90% e iPhone-ve janë montuar në atë vend. Pekini është deri tani zona më e prekur në luftën tregtare të nisur nga Donald Trump, me tarifa që mund të arrijnë deri në 54% për produktet e importuara.