Kur flitet për inteligjencën, shumica e njerëzve mendojnë për një IQ të lartë ose kujtesë të fortë. Por Steve Jobs besonte se inteligjenca e vërtetë nuk matet me sasinë e njohurive, por me mënyrën se si i përdor ato.
Bashkëthemeluesi i Apple thoshte se njerëzit më inteligjentë kanë aftësinë të lidhin ide dhe përvoja që, në pamje të parë, nuk kanë lidhje mes tyre. Sipas tij, pikërisht nga këto lidhje lindin idetë më të mira dhe inovacionet.
Një nga thëniet e tij më të njohura është: “Kreativiteti është thjesht lidhja e gjërave.”
Në një konferencë në Aspen në vitin 1982, Jobs shpjegoi se njerëzit inteligjentë nuk përqendrohen vetëm te problemi që kanë përpara, por dinë të bëjnë një hap pas dhe ta shohin situatën në tërësi. Kjo u jep mundësinë të zbulojnë lidhje dhe zgjidhje që të tjerëve u shpëtojnë.
Ai besonte se njohuritë, sado të shumta të jenë, nuk mjaftojnë nëse nuk kombinohen me kureshtje, përvoja të ndryshme dhe mendim krijues.
Kjo filozofi u reflektua edhe në mënyrën si drejtonte Apple. Një nga citatet e tij më të njohura ishte:
“Nuk ka kuptim të punësosh njerëz të zgjuar dhe pastaj t’u thuash çfarë të bëjnë. Ne punësojmë njerëz të zgjuar që ata të na tregojnë neve çfarë duhet të bëjmë.”
Për Steve Jobs, inteligjenca nuk kishte të bënte vetëm me përgjigjet e sakta, por me aftësinë për të parë pamjen e madhe, për të bërë pyetjet e duhura dhe për të lidhur ide që të tjerët nuk i shohin.