Dy motrat siameze, Mersi dhe Gudnes, të lindura të bashkuara në pjesën e kokës, janë ndarë me sukses falë një operacioni pionier të asistuar nga inteligjenca artificiale. Vajzat, të lindura në qershor të vitit 2023 në Nigeri, ndanin një pjesë të trurit, kafkës dhe enëve të gjakut, duke e bërë ndërhyrjen jashtëzakonisht të ndërlikuar.
Në moshën gjashtëmuajshe ato u morën nën kujdesin e organizatës britanike Gemini Untwined, ndërsa në vitin 2025 udhëtuan drejt Abu Dhabit, ku iu nënshtruan një sërë procedurash në spitalin SEHA Sheikh Khalifa Medical City.
Operacioni, i cili zgjati më shumë se 40 orë, konsiderohet vetëm i nënti në histori për ndarjen e binjakëve kraniopagus – një formë shumë e rrallë e binjakëve siamezë të bashkuar në kokë. Mjekët përdorën inteligjencën artificiale për të krijuar modele të detajuara 3D të trurit, duke u mundësuar kirurgëve të simulonin ndërhyrjen në realitet të përzier përpara operacionit.
Ekipi mjekësor përdori gjithashtu teknikën inovative “Open Book”, e cila shfrytëzon gravitetin për të mbështetur trurin dhe për të ulur rrezikun e dëmtimeve gjatë ndërhyrjes. Përveç kësaj, AI ndihmoi edhe në planifikimin e vendosjes së zgjeruesve të lëkurës, duke siguruar mbulim të mjaftueshëm të kafkave të reja pa pasur nevojë për transplantim të lëkurës.