Matt Damon dhe Ben Affleck po përballen me një padi lidhur me filmin The Rip, pasi disa policë nga Miami pretendojnë se janë portretizuar padrejtësisht si të korruptuar dhe të lidhur me krimin. Filmi i Netflix, i frymëzuar nga një ngjarje reale, bazohet në një aksion policor të vitit 2016 në Miami Lakes, ku u sekuestruan mbi 24 milionë dollarë të lidhura me pastrim parash, konfiskimi më i madh në historinë e policisë së Miami-Dade.
Policët që morën pjesë në operacion thonë se filmi përfshin skena të trilluara që i paraqesin si bashkëpunëtorë të karteleve të drogës dhe të përfshirë në përvetësim të paligjshëm të parave. Njëri prej tyre, detektivi Jonathan Santana, deklaroi se pas publikimit të filmit është bërë objekt talljeje dhe pyetjeve nëse kishte “vjedhur para”. Ekspertët juridikë theksojnë se çështja mund të jetë e vështirë për paditësit, pasi figura publike si policët duhet të provojnë se autorët e filmit kanë vepruar me “keqdashje reale” duke publikuar informacione që e dinin se ishin të pavërteta.