Aktori britanik Rupert Everett, i njohur për rolin e tij në filmin My Best Friend’s Wedding, ka bërë një rrëfim të sinqertë për pasojat që i ka lënë obsesioni i dikurshëm për trupin perfekt.
Everett zbuloi se gjatë viteve ’90, kur ishte në kulmin e famës në Hollywood, kalonte shumë kohë në palestër për të ndërtuar një fizik sa më tërheqës. Megjithatë, ai pranon se sot po paguan një çmim të lartë për atë periudhë.
“E kam shkatërruar veten. Për shkak të kësaj, sot jam pothuajse invalid. Ngrija pesha, por nuk bëja gjërat që duhej t’i shoqëronin ato, si ushtrimet e shtrirjes. Tendinat ngurtësohen me kalimin e kohës dhe unë i shmangia ato sepse më dukeshin të mërzitshme”, tha aktori.
Megjithatë, ai kujton me nostalgji kohën kur konsiderohej një nga meshkujt më të pashëm të Hollywoodit.
“Në një moment dukesha fantastik. Kisha muskuj, kisha gjithçka”, tha ai me humor.
Aktori 67-vjeçar tregoi se sot nuk frekuenton më palestrën dhe aktiviteti i tij fizik kryesor janë shëtitjet me qenin. Ai shtoi se tashmë preferon një jetë të qetë dhe larg ritmit të ethshëm që e shoqëronte dikur si yll i kinemasë.
“Do të mund të rrija i lumtur vetëm duke parë pranverën. Më interesojnë gjërat e vogla të jetës”, u shpreh Everett.
Aktori jeton larg vëmendjes së madhe mediatike së bashku me bashkëshortin e tij, Enrique, me të cilin u martua në vitin 2024. Edhe pse është larguar nga gara për famë, ai vazhdon të jetë aktiv në aktrim, duke u shfaqur në seriale të suksesshme si The Serpent Queen, Adult Material dhe The Name of the Rose.
Sot, Everett thotë se zgjedh projektet që i pëlqejnë dhe jo ato që premtojnë famë, duke e shijuar jetën me më shumë qetësi dhe larg presionit për të qenë gjithmonë perfekt.