Aktorja e njohur italiane Monica Bellucci ka folur hapur për plakjen, bukurinë dhe rëndësinë e marrëdhënieve njerëzore, duke theksuar se nuk shqetësohet aspak për kalimin e viteve.
“Nuk më interesojnë vitet e mia. Është e kotë të luftosh me kohën, sepse në fund gjithmonë humbet. Duhet të ndihemi me fat që po plakemi, veçanërisht nëse jemi të rrethuar nga njerëz që i duam dhe që na duan”, tha Bellucci në një intervistë për gazetën serbe Politika.
Aktorja 61-vjeçare theksoi se familja, miqtë dhe pasioni për punën janë gjërat që e bëjnë të ndihet e gjallë dhe e lumtur, pavarësisht kalimit të kohës.
Duke reflektuar mbi periudhën e pandemisë, Bellucci tha se ajo i bëri shumë njerëz të kuptonin se marrëdhëniet njerëzore janë pasuria më e madhe që posedojmë.
“Mendoj se ajo që përjetuam gjatë pandemisë na bëri të kuptojmë se marrëdhëniet njerëzore janë gjëja më e rëndësishme që kemi në jetë”, u shpreh ajo.
Ylli i kinematografisë italiane tha gjithashtu se pjekuria i ka sjellë mundësi të reja edhe në karrierën e saj si aktore.
“Të jesh një grua e pjekur është interesante edhe për një aktore, sepse të jep mundësinë të luash role të ndryshme. Ndërsa fizikisht ndryshojmë, përvoja na ndihmon të shprehim emocione dhe aspekte të tjera të jetës”, tha Bellucci.
Ajo foli edhe për sfidat që sjell bukuria në industrinë e filmit, duke theksuar se pamja e jashtme shpesh krijon paragjykime.
“Kur je e bukur, është sikur të mbash një maskë. Njerëzit krijojnë një ide për ty pa u interesuar se kush je në të vërtetë. Shpesh përballesh me paragjykime si: ‘Ajo është e bukur, pra është budallaqe’. Me këtë duhet të përballesh gjatë gjithë jetës”, përfundoi aktorja.