Historia prekëse e një qeni në Sao Paulo ka çuar në ndryshimin e ligjit në Brazil, tani kafshët shtëpiake mund të varrosen së bashku me pronarët e tyre. Qeni, i quajtur Bob, jetoi për një dekadë në varrezën ku ishte varrosur pronari i tij dhe refuzoi të largohej prej aty. Edhe kur familjarët përpiqeshin ta merrnin në shtëpi, Bob kthehej çdo herë te varri, duke u bërë i njohur për besnikërinë e tij dhe për mënyrën si ndiqte ceremonitë mortore të tjerëve. Kur ai u godit nga një automjet në vitin 2021, u varros pranë pronarit, në të njëjtin vend ku kishte zgjedhur të jetonte.
Ligji i ri, emëruar “Bob Coveiro”, njohu zyrtarisht lidhjen emocionale midis njerëzve dhe kafshëve të tyre shtëpiake. Ai lejon që qentë dhe macet të prehen në varret familjare në Brazilin juglindor, me kusht që të respektohen rregullat sanitare dhe procedurat e varrezave lokale. Me 160 milionë kafshë shtëpiake, Brazili është një nga vendet me popullsinë më të madhe të tyre në botë.