Japonia po përballet me një fenomen të pazakontë: sipas regjistrimit zyrtar, vendi ka rreth 9 milionë banesa të zbrazëta, ose 13.8% të fondit të përgjithshëm të banesave. Rreth 3.85 milionë prej tyre janë realisht të braktisura dhe nuk përdoren as për qira e as si shtëpi pushimi.
Këto shtëpi njihen si “akiya”. Në disa zona rurale, pronat ofrohen për vetëm 1 jen, madje ndonjëherë edhe falas. Arsyeja lidhet me plakjen dhe zvogëlimin e popullsisë, largimin e të rinjve drejt qyteteve të mëdha dhe mënyrën se si vlerësohen pronat në Japoni: pas rreth 20-30 vjetësh, vetë ndërtesa mund të konsiderohet pothuajse pa vlerë, ndërsa vlera mbetet kryesisht te toka.
Por një shtëpi pothuajse falas mund të kushtojë shumë pas blerjes. Rinovimi, taksat, regjistrimi dhe mirëmbajtja mund ta shumëfishojnë koston reale. Disa komuna ofrojnë subvencione për njerëzit që marrin përsipër restaurimin e këtyre pronave.
Edhe të huajt mund të blejnë shtëpi dhe tokë në Japoni, por blerja e pronës nuk të jep automatikisht të drejtën për të jetuar atje; për qëndrim afatgjatë nevojitet vizë e përshtatshme.