Inteligjenca artificiale mund të jetë një mjet i fuqishëm për biznesin dhe përditshmërinë, por gabimet e saj mund të jenë shumë serioze. Muzikanti kanadez Ashley MacIsaac e përjetoi këtë në mënyrën më të keqe, kur një shfaqje e tij u anulua papritur pasi Google AI e identifikoi gabimisht si një shkelës seksual. AI-ja e Google prodhoi një përmbledhje të pasaktë të biografisë së tij, duke e ngatërruar me një person tjetër me të njëjtin emër, çka mjaftoi që organizatorët e koncertit të tërhiqeshin menjëherë.
Edhe pse Google e korrigjoi gabimin, MacIsaac pyet veten sa dëm i është bërë reputacionit të tij dhe sa mundësi mund të ketë humbur. Ai u rekomandon të gjithëve të kontrollojnë emrin e tyre në internet për t’u siguruar se nuk lidhen gabimisht me informacione të rrezikshme. Organizatorët i kërkuan falje dhe shprehën gatishmëri ta rikthejnë në aktivitetet e ardhshme, ndërsa Google tha se raste të tilla shërbejnë për të përmirësuar sistemet e tyre.