Një gjykatë në SHBA vendosi se ngjashmëritë mes dramave mjekësore “The Pitt” dhe “ER” janë të mjaftueshme që padia ndaj Warner Bros. të vazhdojë. Gjykata vuri në dukje se të dy serialet zhvillohen në urgjencë, kanë ritëm të shpejtë dhe ndjekin mjekë të rinj gjatë trajnimit.
Sherri Crichton, e veja e krijuesit të “ER”, Michael Crichton, pretendon se “The Pitt” është një version i ri i serialit, i realizuar pa lejen e kërkuar nga kontrata dhe pa ia njohur meritat autorit. Warner Bros. e kundërshton pretendimin dhe thotë se “The Pitt” është një serial origjinal.
Të dy serialet kanë edhe një emër të përbashkët, aktorin Noah Wyle. Ai luajti doktorin John Carter në “ER” dhe ka rolin kryesor në “The Pitt”. Vendimi lejon që çështja të shqyrtohet nga një juri në Los Anxhelos, ku do të vendoset nëse është shkelur kontrata.