Një studim i ri sugjeron se zakoni i përditshëm i pirjes së çajit ose kafesë mund të ketë ndikim të rëndësishëm në shëndetin e kockave te gratë. Osteoporoza mbetet një sëmundje shumë e përhapur te gratë mbi 50 vjeç, duke i bërë kockat gjithnjë e më të brishta për shkak të uljes së nivelit të estrogjenit pas menopauzës ose pas heqjes së vezoreve.
Hulumtimi, i realizuar nga Universiteti Flinders në Australi, analizoi zakonet e konsumimit të çajit dhe kafesë te rreth 9.700 gra amerikane mbi 65 vjeç, përgjatë më shumë se një dekade. Rezultatet treguan se gratë që pinin rregullisht çaj kishin dendësi më të mirë minerale të kockave në zonën e ijeve. Kjo lidhet me katekinat në çaj, të cilat ndihmojnë procesin e ndërtimit të kockave – efekt që ishte edhe më i theksuar te gratë mbipeshë.
Kafeja dha rezultate të përziera. Gratë që konsumonin më shumë se pesë filxhanë kafe në ditë kishin dendësi më të ulët të kockave, pasi sasia e lartë e kafeinës mund të pengojë përthithjen e kalciumit. Efekti ishte edhe më i fortë te gratë që konsumonin rregullisht alkool gjatë jetës. Studiuesit theksojnë se rezultatet nuk nënkuptojnë braktisjen e kafesë, por se konsumimi i tepruar mund të mos jetë i favorshëm për shëndetin e kockave.
Sipas epidemiologut Envu Liu, çaji i konsumuar në mënyrë të moderuar mund të jetë një zakon i vogël, por i dobishëm për forcimin e kockave. Ndërkohë, kalciumi dhe vitamina D mbeten bazë e domosdoshme për shëndetin kockor, ndërsa kontrolli i sasisë së kafesë – veçanërisht te gratë që konsumojnë alkool – është po aq i rëndësishëm.