Një studim i ri tregon se inteligjenca artificiale po zë gjithnjë e më shumë hapësirë në industrinë muzikore. Sipas të dhënave të publikuara nga SubmitHub, nga më shumë se një milion këngë të analizuara gjatë korrikut, 23.2 për qind rezultuan të gjeneruara tërësisht nga inteligjenca artificiale, ndërsa 15.3 për qind përmbanin elemente të krijuara nga AI dhe më pas të përpunuara nga njerëzit. Në total, rreth 38.5 për qind e muzikës së publikuar gjatë muajit ishte krijuar, të paktën pjesërisht, me ndihmën e AI-së.
Rritja e muzikës së gjeneruar nga inteligjenca artificiale ka hapur debat rreth transparencës, të drejtave të autorit dhe rolit të krijimtarisë njerëzore. Platforma të ndryshme muzikore tashmë po reagojnë, disa duke kufizuar përmbajtjen e krijuar plotësisht nga AI dhe të tjera duke zhvilluar etiketime që tregojnë kur kjo teknologji është përdorur në krijimin e një kënge.