Kanë kaluar mbi 20 vjet që kur Gmail u lançua, dhe nëse u regjistruat në fillimet e tij, ka shumë mundësi që tashmë të jeni lodhur nga adresa juaj e vjetër e email-it.
Qoftë një adresë qesharake si crazyfrog337@gmail.com
, ose thjesht keni ndryshuar mbiemrin pas martesës apo divorci, ka shumë arsye pse prania juaj online mund të ketë nevojë për një përditësim.
Derisa deri tani, nëse donit një adresë të re Gmail, duhej të krijonit një llogari të re, një përditësim i shërbimit duket se po vjen, i cili do t’u lejojë përdoruesve të ndryshojnë adresën e tyre pa humbur llogarinë ekzistuese. Kjo do të thotë që lidhjet me YouTube, Google Photos, Maps etj. nuk do të preken.
Ky opsion është parë deri tani vetëm në versionin në gjuhën Hindi të Qendrës së Ndihmës së Google. Një përkthim i tekstit thotë:
“Nëse dëshironi, mund të ndryshoni adresën e email-it të Llogarisë suaj Google që përfundon me @gmail.com në një adresë të re që përfundon gjithashtu me @gmail.com.
E rëndësishme: Mundësia për të ndryshuar adresën e email-it të Llogarisë Google po ofrohet gradualisht për të gjithë përdoruesit, kështu që kjo mund të mos jetë e disponueshme për ju në këtë moment.”
Faqja e ndihmës shpjegon gjithashtu se do të mund të vazhdoni të përdorni adresën tuaj të vjetër, e cila do të shërbejë si një “alias”. Kështu, kushdo që nuk e ka kuptuar ndryshimin do të mund t’ju kontaktojë ende në adresën e vjetër.
Sipas faqes së ndihmës:
“Të dhënat e ruajtura në llogarinë tuaj, duke përfshirë fotot, mesazhet dhe emailet e dërguara në adresën tuaj të vjetër, nuk do të preken.”
Megjithatë, do të ketë disa kufizime: nuk mund të krijoni një adresë të re Gmail për 12 muajt e ardhshëm dhe nuk do të mund të fshini adresën e re menjëherë pas ndryshimit.
Shërbime të tjera të email-it online tashmë lejojnë përditësimin e adresës, por pasi Gmail është më i përdoruri në botë, ky ndryshim pritet të ndikojë tek shumë përdorues. Deri tani, mund të ndryshoje vetëm emrin e lidhur me llogarinë, jo adresën vetë.
Ky opsion u zbulua për herë të parë në grupin Google Pixel Hub në Telegram dhe u raportua nga 9to5 Google, por ende nuk është shpallur në versionin anglisht të Qendrës së Ndihmës, gjë që ka çuar në spekulime se mund të jetë bërë publike më herët se sa ishte planifikuar.