Gjigandi gjerman i automobilave Volkswagen Group planifikon të eliminojë rreth 50,000 vende pune në Gjermani deri në vitin 2030, pasi fitimi neto i kompanisë në vitin 2025 ra me 44 për qind dhe arriti në 6.9 miliardë euro. Sipas raportimeve të Euronews, ky është rezultati më i dobët financiar i kompanisë që nga skandali i motorëve me naftë në vitin 2015. Drejtori ekzekutiv Oliver Blume ka bërë të ditur se programi i uljes së kostove do të zgjerohet, duke rritur numrin e vendeve të punës që pritet të shkurtohen, krahasuar me planin e mëparshëm prej 35,000 vende pune të rënë dakord me sindikatat në vitin 2024.
Të ardhurat e kompanisë mbetën rreth 322 miliardë euro, ndërsa fitimi operativ pothuajse u përgjysmua në rreth 8.9 miliardë euro. Sipas drejtuesve të kompanisë, industria po përballet me një mjedis shumë sfidues, të ndikuar nga tensionet gjeopolitike, barrierat tregtare dhe konkurrenca në rritje, sidomos nga prodhuesit kinezë si BYD, Geely dhe Nio. Volkswagen shiti rreth 8.98 milionë automjete në vitin 2025, një rënie e lehtë krahasuar me vitin e kaluar. Megjithatë, kompania pret një përmirësim të situatës në vitin 2026 dhe një rritje të marzhit operativ deri në 5.5 për qind.