Gjatë muajve të dimrit, kur rrezet e diellit janë të pakta, shumë njerëz mbështeten te suplementet e vitaminës D dhe me arsye. Sipas udhëzimeve britanike, të rriturit dhe fëmijët mbi një vjeç duhet të marrin rreth 10 mikrogramë vitaminë D në ditë nga tetori deri në fillim të marsit, pasi trupi nuk arrin ta prodhojë mjaftueshëm nëpërmjet ekspozimit në diell. Ekspertët paralajmërojnë se tejkalimi i dozave mund të shkaktojë hiperkalcemi, një gjendje e rrezikshme që dobëson kockat dhe dëmton veshkat dhe zemrën. Madje, studimet tregojnë se dozat e larta nuk sjellin përfitime shtesë për dendësinë kockore, por ndonjëherë madje e përkeqësojnë atë.
Po aq i rëndësishëm sa doza është edhe lloji i vitaminës D. Dy format më të zakonshme janë D2 (ergokalciferol) dhe D3 (kolekalciferol). Vitamina D3, e cila gjendet në ushqime shtazore dhe prodhohet natyrshëm nga trupi përmes rrezeve të diellit, rezulton më efektive në rritjen e niveleve të vitaminës D në gjak. Për më tepër, kërkimet tregojnë se suplementet me D2 madje mund të ulin nivelet e D3 në trup. Për këtë arsye, shumica e ekspertëve rekomandojnë zgjedhjen e vitaminës D3, përveç rasteve kur ndiqet një dietë vegane, ku opsionet kufizohen te D2.