Një sfidë e shpeshtë që po ndodh në institucionet shëndetësore në Kosovë është hakmarrja ndaj sinjalizuesve pas denoncimeve publike të parregullsive dhe keqpërdorimeve brenda këtyre institucioneve. Lidhur me këtë çështje, kemi biseduar me juristen Albana Hasani nga Lëvizja FOL, një nga organizatat aktive në Kosovë që fokusohet në mbështetjen, promovimin dhe avokimin për politikat publike cilësore, qeverisjen e mirë, transparencën dhe llogaridhënien në të gjitha nivelet.
Albana Hasani nga Lëvizja FOL, në mënyrë profesionale, përshkruan masat mbrojtëse që ekzistojnë për të siguruar që sinjalizuesit të mos përballen me hakmarrje pas denoncimit publik të një shkeljeje, si dhe metodat më praktike për të parandaluar përdorimin e komisioneve disiplinore si mjet hakmarrjeje ndaj sinjalizuesve.
“Sinjalizuesit mbrohen nga çdo veprim i dëmshëm i marrë ndaj tij nga punëdhënësi pas sinjalizimit të tij, duke përfshirë shkarkimin nga puna, pezullimin nga puna, transferimin brenda ose jashtë institucionit dhe disa masa të tjera siç është ulja në pozitë apo zvogëlimi i pagesës e çështje të tjera që janë paraparë në nenin 22 të Ligjit për mbrojtjen e sinjalizuesve. Por çdo vendim i dëmshëm i ndërmarrë ndaj sinjalizuesit nga punëdhënësi i tij është i pavlefshëm. Në rast se ndërmerret ndonjë veprim padyshim që sinjalizuesi ka të drejtë të ngrejë padi në gjykatën kompetente dhe e para e provës i takon në këtë rast të paditurit e jo palës paditëse, që në këtë rast është sinjalizuesi” .
Juristja Albana Hasani nga Lëvizja FOL, përveç amendamentimit të Ligjit për Mbrojtjen e Sinjalizuesve, sugjeron edhe formimin e një paneli të pavarur me ekspertë të jashtëm për shqyrtimin e ankesave të sinjalizuesve.
“Përveç amandametimit të ligjit për mbrojtje të sinjalizuesve do me thënë do të përfshihej siç e thashë ndalimi i rreptë i krijimit të komisioneve disiplinore brenda institucioneve, ne do të kishim propozuar formimin e një paneli të pavarur, për të shqyrtuar ankesat e sinjalizuesve. Realisht rregullorja për mbrojtjen e sinjalizuesve që është nxjerrë nga Ministria e Drejtësisë, parasheh themelimin e një paneli të tillë të ankesave brenda çdo institucioni, mirëpo se sa realisht po realizohet, po zbatohet në praktikë dërgimi i ankesave në këtë panel të brendshëm do me thënë institucional nuk kemi informacione.
Ndërsa sa i përket asaj se si mund të përmirësohet legjislacioni aktual për të mbrojtur sinjalizuesit nga ndëshkimet e padrejta juristja Hasani thotë se Ligji duhet të ndalojë çdo formë hakmarrjeje ndaj sinjalizuesve.
Mbrojtja e sinjalizuesve në institucionet shëndetësore të Kosovës mbetet një sfidë kritike dhe e vazhdueshme. Siç u theksua nga juristja Albana Hasani nga Lëvizja FOL, ekzistojnë masa ligjore që synojnë të mbrojnë sinjalizuesit nga hakmarrjet e mundshme.
Ne do të vazhdojmë me intervista të tjera me ekspertë të organizatave të ndryshme që merren me mbrojtjen e sinjalizuesve me qëllim që të ofrojmë mbështetje dhe mbrojtje më të fortë për individët që guxojnë të denoncojnë parregullsitë dhe keqpërdorimet e mundshme brenda institucioneve publike.
Për ta dëgjuar këtë intervistë me juristen Albana Hasani nga Lëvizja FOL, klikoni në pjesën audio më poshtë.
Për të marrë më shumë informacione të ngjashme, klikoni mbi linçet e mëposhtme.
https://www.facebook.com/share/p/DMoZ17z4HxNezyUR/?mibextid=oFDknk
https:/radiovalarinore.com/ja-se-cfare-foli-sy-me-sy-me-kryeministrin-kurti-stomatologia-erza-mulaj
