Reshjet intensive dhe përmbytjet mund të paraqesin rreziqe të menjëhershme për sigurinë e qytetarëve kudo në vend. Sipas udhëzimeve të institucioneve ndërkombëtare si FEMA, Organizata Botërore e Shëndetësisë (WHO) dhe Kryqi i Kuq Ndërkombëtar, qytetarët duhet të ndjekin disa masa të rëndësishme mbrojtëse për të shmangur rreziqet gjatë përmbytjeve.
1. Shmangni lëvizjen në zonat e përmbytura
FEMA paralajmëron se vetëm 15 cm ujë mund të rrëzojë një person, ndërsa 30 cm ujë mund të lëvizë një makinë. Prandaj, ecja apo drejtimi i automjeteve nëpër ujë të përmbytur është e rrezikshme edhe nëse duket i cekët. Qëndroni larg rrugëve të bllokuara, nënkalimeve dhe brigjeve të lumenjve.
2. Mos prekni ujin e përmbytur
Sipas WHO, uji i përmbytur mund të përmbajë ndotje, mbetje kimike dhe bakterie të rrezikshme. Shmangni kontaktin e drejtpërdrejtë me të, veçanërisht fëmijët. Përdorni vetëm ujë të paketuar ose të komfirmuar të sigurt për konsum.
3. Qëndroni të informuar dhe ndiqni njoftimet zyrtare
Institucionet meteorologjike dhe emergjencat civile publikojnë paralajmërime të rregullta. Ndiqni kanalet zyrtare, mos u bazoni vetëm në rrjetet sociale dhe respektoni çdo udhëzim për evakuim nëse jepet.
4. Përgatitni një çantë emergjence
Kryqi i Kuq rekomandon të keni gati një çantë me:
- ujë, ushqime bazike dhe ilaçe,
- dokumente të rëndësishme,
- karikues portativ dhe bateri,
- mjete higjienike.
Kjo ndihmon në rast se evakuimi kërkohet menjëherë.
5. Kujdes me energjinë elektrike dhe pajisjet
Shkëputni energjinë elektrike nëse ka rrezik që uji të hyjë në ambiente të brendshme. Mos prekni pajisje elektrike me duar të lagura dhe mos qëndroni pranë kabllove të ekspozuara.
Përmbytjet kërkojnë kujdes, vigjilencë dhe veprim të shpejtë. Duke ndjekur këshillat nga AME dhe institucioneve të sigurisë dhe shëndetit, qytetarët mund të minimizojnë rrezikun dhe të mbrojnë veten dhe familjet e tyre. Qëndroni të informuar, shmangni zonat me ujë dhe veproni me kujdes deri në përmirësimin e kushteve atmosferike.