Dr. Murat Mehmeti: “Stigma po bie, por rreziku po rritet”
Gjatë shtatë muajve të parë të këtij viti, në Kosovë janë regjistruar 19 raste të reja me virusin HIV, një shifër që paraqet rritje në krahasim me vitet e kaluara dhe që ka nxitur shqetësim në mesin e profesionistëve shëndetësorë. Sipas të dhënave nga Klinika Infektive në QKUK, rastet e reja prekin kryesisht të rinjtë, ndërsa institucionet vazhdojnë të bëjnë thirrje për rritje të ndërgjegjësimit dhe masave parandaluese.
Shefi i Repartit të Sëmundjeve Infektive në QKUK, Dr. Murat Mehmeti, thekson se megjithëse trajtimi mjekësor për HIV është i disponueshëm dhe ka terapi të mjaftueshme, përfshirë edhe atë parandaluese, trendi në rritje i rasteve është shqetësues dhe rrezikon të tejkalojë shifrat e vitit të kaluar.
“Një nga faktorët që mund të ketë ndikuar në këtë rritje është lëvizja më e lirë e qytetarëve pas liberalizimit të vizave, por shkaku kryesor mbetet mospërdorimi i mjeteve mbrojtëse gjatë marrëdhënieve seksuale”, deklaroi Dr. Mehmeti në emisionin “Forever Young” në Radio Vala Rinore.
Sipas tij, vitet e fundit është vërejtur një përmirësim i ndjeshëm në uljen e stigmatizimit, si ndaj testimit për HIV, ashtu edhe ndaj vetë personave të prekur. Megjithatë, ai thekson se ky progres nuk është i mjaftueshëm për të ndalur përhapjen e infeksionit.
Dr. Mehmeti gjithashtu paralajmëroi për një rritje të rasteve me sifiliz, një infeksion që më parë kishte një përhapje minimale në Kosovë, por që tashmë po rikthehet si një kërcënim serioz për shëndetin publik.