Këngëtarja spanjolle Rosalía ka kërkuar falje publike pas komenteve që bëri së fundmi për piktorin e njohur Pablo Picasso, të cilat shkaktuan reagime kritike në publik. Gjatë një interviste në serinë “Spotify Presenta”, ajo tha se beson në ndarjen mes jetës personale të një artisti dhe veprës së tij, duke theksuar se gjithmonë ka admiruar artin e Picassos edhe pse mund të mos pajtohej me disa aspekte të jetës së tij personale.
Pas kritikave në rrjetet sociale, Rosalía publikoi një video ku kërkoi falje dhe shpjegoi se më parë nuk kishte qenë e informuar për akuzat që lidhen me sjelljen e Picassos ndaj grave, përfshirë pretendime për abuzim dhe mizogjini. Ajo tha se pas disa ditësh kërkimesh vendosi të reagojë publikisht dhe theksoi se është e rëndësishme të mos flitet për tema të caktuara pa pasur njohuri të mjaftueshme. Këngëtarja shtoi se i vjen keq nëse komentet e saj kanë treguar mungesë ndjeshmërie ndaj grave që kanë rrëfyer përvojat e tyre.