Këngëtarja me famë ndërkombëtare, Rita Ora, bëri një paraqitje të shkëlqyer në finalen e spektaklit televiziv “The Masked Singer US”, ku ishte një nga anëtaret e jurisë. E njohur për zërin e saj të fuqishëm dhe praninë karizmatike, Rita dha një shfaqje mbresëlënëse në një nga spektaklet më të ndjekura në televizionin amerikan.
Në llogarinë e saj zyrtare në Instagram, 33-vjeçarja ndau me fansat disa fotografi ku shfaqej mahnitëse e veshur me një fustan të gjatë rozë dhe me flokët e mbledhura në një stil elegant.
“Nuk mund ta besoj se sonte është finalja e madhe e ‘The Masked Singer US’! Ka qenë një përvojë e pabesueshme të jem pjesë e panelit të gjykimit dhe jam shumë mirënjohëse që kam qenë dëshmitare e talenteve të tilla të mahnitshme!”, ka shkruar Ora pranë postimit.
