Banorët e qytetit bregdetar Porthcawl në Uells mbetën të habitur kur panë dy emra të mëdhenj të industrisë së argëtimit, Quentin Tarantino dhe Kylie Minogue, duke xhiruar së bashku një projekt të ri filmik.
Dyshja u pa duke xhiruar skena në disa lokacione të qytetit, përfshirë një kishë në zonën e Newton dhe lokalin Saltwater Inn, ku sipas raportimeve po realizoheshin skena funerali dhe një ceremonie përkujtimore. Banorët lokalë thanë se mbetën “duke fërkuar sytë nga mosbesimi” kur panë ikonën e muzikës pop dhe regjisorin e famshëm hollivudian në rrugët e qytetit të tyre.
Filmi i ri po drejtohet nga regjisori uellsian Jamie Adams, i cili së fundmi bashkëpunoi me Tarantinon në filmin “Only What We Carry”, që pati premierën në Festivalin Tribeca këtë muaj.
Sipas mediave britanike, në projekt marrin pjesë edhe disa aktorë të njohur uellsianë, ndërsa anëtarë të korit mashkullor të Porthcawl janë përfshirë në disa nga skenat e filmit.
Detajet rreth filmit mbeten ende sekret, por prania e Tarantinos dhe Kylie Minogue ka ngjallur interes të madh te fansat e kinemasë dhe muzikës. Fotografitë dhe videot nga xhirimet janë përhapur me shpejtësi në rrjetet sociale, duke nxitur spekulime mbi natyrën e projektit dhe rolet që do të luajnë dy yjet.
Për momentin, producentët nuk kanë zbuluar titullin apo datën e publikimit të filmit, por vetëm prania e Tarantinos dhe Minogue në të njëjtin projekt ka mjaftuar për ta kthyer xhirimin në një nga temat më të komentuara të ditës.