Peshkaqenët nuk janë vetëm grabitqarë të frikshëm të oqeaneve. Studimet e fundit shkencore tregojnë se ata zotërojnë aftësi të avancuara të të mësuarit, kujtesës dhe madje edhe aftësi bazë matematikore.
Sipas studiuesve, peshkaqenët mund të dallojnë sasi të ndryshme, si për shembull tre nga pesë ose katër nga shtatë, ndërsa janë në gjendje të mësojnë dhe të mbajnë mend forma, modele dhe iluzione optike për periudha të gjata.
Një tjetër zbulim interesant vjen nga një eksperiment i Universitetit Macquarie në Australi, ku peshkaqenët Port Jackson mësuan të lidhnin tingujt e muzikës xhaz me marrjen e ushqimit. Kur dëgjonin xhazin, ata notonin drejt vendit ku i priste ushqimi, ndërsa të njëjtën lidhje nuk arritën ta krijonin me muzikën klasike.
Përveç inteligjencës, peshkaqenët shfaqin edhe sjellje sociale të zhvilluara. Disa specie krijojnë grupe të qëndrueshme dhe kalojnë vite me të njëjtët individë, ndërsa të vegjlit mësojnë nga njëri-tjetri si të gjejnë ushqim dhe të shmangin grabitqarët.
Shkencëtarët kanë zbuluar gjithashtu se disa lloje lindin të vegjlit përmes një procesi të ngjashëm me gjitarët, ndërsa te peshkaqeni tigër i rërës ndodh edhe kanibalizmi brenda mitrës, ku embrioni më i fortë ushqehet me vëllezërit dhe motrat e tij para lindjes.
Peshkaqenët janë ndër vertebrorët më të lashtë në Tokë. Paraardhësit e tyre kanë jetuar rreth 450 milionë vjet më parë, shumë kohë përpara dinosaurëve, pemëve dhe madje edhe unazave të Saturnit, duke i bërë ata një nga grupet më të suksesshme të kafshëve në historinë e planetit.