Temperaturat e larta nuk janë sfidë vetëm për njerëzit, por edhe për telefonat, laptopët dhe pajisjet e tjera elektronike. Ekspertët këshillojnë që pajisjet të mbahen gjithmonë larg rrezeve direkte të diellit, pasi edhe disa minuta ekspozim mund të shkaktojnë mbinxehje dhe të dëmtojnë baterinë apo komponentët e brendshëm.
Një nga gabimet më të zakonshme është vendosja e telefonit ose laptopit në frigorifer për t’i ftohur. Ndryshimi i menjëhershëm i temperaturës mund të shkaktojë dëmtime serioze, ndërsa lagështia brenda frigoriferit rrit rrezikun për prishjen e pajisjes.
Specialistët rekomandojnë mbajtjen e ambientit të freskët me ventilator ose kondicioner, uljen e roletave gjatë ditës dhe shmangien e përdorimit intensiv të pajisjeve në vapë. Lojërat, transmetimet online, aplikacionet e inteligjencës artificiale, ndriçimi maksimal i ekranit dhe karikimi i baterisë e rrisin temperaturën e pajisjes.
Një tjetër këshillë është heqja e maskave mbrojtëse kur telefoni ose laptopi nxehet shumë, pasi ato pengojnë shpërndarjen e nxehtësisë. Megjithatë, pajisja duhet të trajtohet me kujdes, pasi pa mbrojtëse është më e ndjeshme ndaj dëmtimeve nga rënia.
Ekspertët theksojnë se pushimet e shkurtra gjatë përdorimit dhe aktivizimi i modalitetit të kursimit të baterisë mund të ndihmojnë në uljen e temperaturës dhe zgjatjen e jetës së pajisjeve elektronike.