Një studim i ri ka zbuluar se koha kur shkoni për të fjetur mund të jetë po aq e rëndësishme sa vetë gjumi. Sipas hulumtimit të publikuar në European Heart Journal Digital Health, rreziku më i ulët për sëmundje kardiovaskulare është tek personat që flenë midis orës 22:00 dhe 23:00. Studimi, i bazuar në të dhëna objektive nga mbi 100 mijë pjesëmarrës, tregoi se ata që flenë pas mesnatës kanë deri në 25% rrezik më të lartë për probleme të zemrës, ndërsa edhe fjetja shumë herët apo shumë vonë mund të ndikojë negativisht.
Shkencëtarët e lidhin këtë me ritmin cirkadian, orën e brendshme të trupit që rregullon funksionet tona gjatë 24 orëve. Çdo devijim nga ky ritëm si fjetja shumë vonë apo në orare të parregullta, mund të ndikojë në tensionin e gjakut, rrahjet e zemrës dhe metabolizmin. Edhe pse studimi nuk provon drejtpërdrejt shkakun, ai thekson qartë se ruajtja e një rutine të qëndrueshme të gjumit, veçanërisht në intervalin 22–23, mund të jetë një hap i thjeshtë por i rëndësishëm për mbrojtjen e shëndetit të zemrës.