A mundet inteligjenca artificiale të parashikojë se kush do të fitojë Çmimet Nobel 2026? Deutsche Welle ua bëri këtë pyetje nëntë sistemeve të AI-së, përfshirë ChatGPT, Claude, Gemini, Copilot, DeepSeek, Grok dhe Mistral. Rezultatet treguan një konsensus interesant në disa kategori, por edhe gabime të dukshme.
Në mjekësi, gjashtë nga nëntë sistemet përmendën kërkimet mbi hormonin GLP-1, që kanë çuar në zhvillimin e barnave moderne kundër diabetit dhe obezitetit, si semaglutidi. Pesë prej tyre propozuan shkencëtarët Daniel J. Drucker, Jens Juul Holst dhe Svetlana Mojsov. Në kiminë, favoriti më i shpeshtë ishte David R. Liu për teknikat e avancuara të modifikimit të ADN-së.
Në letërsi, shumica e chatbotëve që dhanë një zgjedhje favorizuan shkrimtaren kineze Can Xue, ndërsa në fizikë emri më i përmendur ishte shkencëtarja Nicola A. Spaldin. Për Nobelin e Paqes, megjithatë, AI-të dhanë përgjigje shumë të ndryshme dhe disa propozuan madje organizata që e kishin fituar çmimin më parë.
Eksperimenti tregoi edhe kufizimet e AI-së: një sistem përmendi një “Nobel për matematikë”, që nuk ekziston, ndërsa një tjetër propozoi një person të ndjerë, megjithëse rregullat e Nobelit përgjithësisht nuk lejojnë çmime pas vdekjes. Fituesit e vërtetë të Nobelit 2026 do të fillojnë të shpallen më 5 tetor.