Marrja e një tablete multivitaminash çdo ditë mund të ketë një ndikim të vogël, por të matshëm, në ngadalësimin e procesit të plakjes biologjike. Ky është përfundimi i një studimi të realizuar nga Mass General Brigham në Boston, ku u ndoqën 958 persona me moshë mesatare rreth 70 vjeç gjatë një periudhe dyvjeçare.
Pjesëmarrësit morën çdo ditë ose multivitamina, ose placebo, ndërsa shkencëtarët analizuan ndryshimet në ADN-në e tyre përmes të ashtuquajturave “orë epigjenetike”, të cilat matin plakjen biologjike. Rezultatet treguan se ata që përdorën rregullisht multivitamina kishin një rritje më të ngadaltë të moshës biologjike, me një diferencë mesatare prej rreth katër muajsh gjatë dy viteve të studimit.
Megjithatë, autorët e studimit theksojnë se këto rezultate janë modeste dhe se nevojiten kërkime të tjera për të vërtetuar ndikimin afatgjatë të multivitaminave në shëndet dhe jetëgjatësi.
Ekspertët rikujtojnë se faktorët më të rëndësishëm për plakje të shëndetshme mbeten një ushqyerje e pasur me fruta dhe perime, aktiviteti i rregullt fizik, gjumi cilësor dhe një stil jetese i shëndetshëm, ndërsa suplementet nuk mund të zëvendësojnë këto zakone.