Shkencëtari dhe nutricionisti australian nga Sidneji, Dr. Vinsent Kandravinata, ka reaguar publikisht duke kërkuar më shumë përgjegjësi nga prindërit kur bëhet fjalë për dërgimin e fëmijëve të sëmurë në çerdhe apo shkollë.
Sipas tij, edhe një ftohje e lehtë mund të kthehet në një zinxhir infeksionesh që prek dhjetëra familje. “Mjafton një fëmijë me virus që brenda pak ditësh të infektohet e gjithë grupi. Më pas sëmundja përhapet në shtëpi, te vëllezërit, motrat, prindërit dhe gjyshërit dhe cikli vazhdon pa fund,” thekson ai.
Dr. Kandravinata paralajmëron se disa prindër u japin fëmijëve barna për uljen e temperaturës para se t’i çojnë në çerdhe, në mënyrë që të mos duken të sëmurë. Ai e konsideron këtë veprim të papërgjegjshëm, pasi rrezikon shëndetin e komunitetit dhe të stafit edukativ.
Ai shton se pasojat nuk janë vetëm disa ditë shqetësim: prindërit humbasin ditë pune, familjet përballen me stres të vazhdueshëm, ndërsa personat me imunitet të dobët mund të përjetojnë komplikime më serioze.
Sipas rekomandimit të tij, fëmija nuk duhet të dërgohet në kolektiv nëse ka:
- Temperaturë
- Kollë të fortë ose të vazhdueshme
- Të vjella apo diarre
- Shenja të dukshme sëmundjeje
“Përgjegjësia është e përbashkët,” thekson Dr. Kandravinata. “Ndonjëherë vendimi më i rëndësishëm për shëndetin nuk është ilaçi që japim, por vendimi për të qëndruar në shtëpi.”
Mesazhi i tij ka nxitur reagime të shumta, por një gjë mbetet e qartë: një vendim i vogël mund të ketë pasoja të mëdha për gjithë komunitetin.