Një nga autorët më me ndikim të muzikës britanike pop dhe alternative, Morisi, ka publikuar albumin e tij të ri solo “Make-Up Is a Lie”.
Ky është publikimi i parë i artistit pas më shumë se pesë vitesh, por edhe albumi i parë për Sire Records dhe Warner Records pas rreth tre dekadash.
Albumi përmban 12 këngë dhe ruan stilin karakteristik të Morisit – poetik, provokues dhe emocionalisht të drejtpërdrejtë. Ndër këngët që veçohen janë “Make-Up Is a Lie”, “Notre-Dame” dhe “The Monsters of Pig Alley”, e cila tashmë është bërë e preferuar në koncertet e tij.
Albumi është realizuar në bashkëpunim me producentin Joe Chiccarelli, i njohur për punën me grupe si The Strokes, The White Stripes, Weezer dhe My Morning Jacket. Regjistrimet janë bërë në studion La Fabrique në jug të Francës.
Një surprizë në album është edhe interpretimi i këngës klasike “Amazona” të grupit Roxy Music nga viti 1973.
Gjatë më shumë se katër dekadave karrierë, Morisi ka ndërtuar reputacionin e një prej figurave më të rëndësishme të muzikës britanike. Si vokalist i grupit legjendar The Smiths, ai u bë i njohur me këngë si “This Charming Man”, “How Soon Is Now?” dhe “There Is a Light That Never Goes Out”.
Edhe karriera e tij solo ka sjellë hite të shumta, përfshirë “Suedehead”, “Everyday Is Like Sunday”, “Irish Blood, English Heart” dhe “First of the Gang to Die”.
Me albumin “Make-Up Is a Lie”, Morisi rikthehet në skenën muzikore duke konfirmuar edhe një herë statusin e tij si një nga artistët më të rëndësishëm të muzikës alternative.