Është e vështirë të imagjinohet që Meryl Streep nuk ka qenë gjithmonë një yll i madh. Në fillimet e saj, ashtu si çdo aktore e re, ajo përpiqej të kalonte nga skena e teatrove të Nju Jorkut drejt ekranit të kinemasë dhe televizionit.
Edhe pse u bë e njohur shpejt, në fillim pranoi role që nuk i pëlqenin, por që i siguronin të ardhura për të paguar qiranë. Ironikisht, një nga këto role i solli çmimin Emmy për aktoren më të mirë në një rol kryesor, shkruan Index.
Në fillim të viteve 1970, Streep studioi në Universitetin Yale me bursë dhe u bë një figurë kyçe në teatrin e këtij institucioni, i njohur për zhvillimin e talenteve të reja. Gjatë studimeve, ajo interpretoi në shtatë nga tetë shfaqjet e vëna në skenë atje. Ajo u diplomua në vitin 1975, me një përvojë të pasur skenike, por edhe me borxhe studentore të konsiderueshme.
Pas Yale, ajo luajti në shfaqje si Henry V, Measure for Measure, The Cherry Orchard dhe Happy End në teatrot më të njohura të Nju Jorkut. Por shumë shpejt filloi të merrte oferta për role televizive dhe filmike.
Në vitin 1977, bëri debutimin e saj në film me The Deadliest Season dhe luajti në dy episode të serialit Great Performances. Po atë vit, ajo u shfaq në filmin e saj të parë, dramën e luftës Julia, e cila ishte e nominuar për Oscar. Ky rol ishte hapi i saj i parë i rëndësishëm drejt suksesit në kinematografi.
Por, përpara se të luante në filmin e saj të dytë, The Deer Hunter, që i solli nominimin e parë për Oscar si aktorja më e mirë në rol dytësor, Streep pati një tjetër rol të rëndësishëm në televizion.
Ajo interpretoi në miniserinë e NBC, Holocaust, e cila u transmetua për pesë netë radhazi dhe u ndoq nga 109 milionë shikues. Aty luajti rolin e Inga-s, një gjermane që zgjedh të shkojë vullnetarisht në një kamp përqendrimi për të qenë pranë bashkëshortit të saj hebre.
Megjithëse disa kritikë e akuzuan serialin për thjeshtëzimin e tragjedisë së hebrenjve, ai u vlerësua gjerësisht për ndërgjegjësimin që solli mbi krimet naziste. Seriali fitoi çmimin Emmy për miniserinë më të mirë dhe tre çmime Emmy për aktrim, përfshirë një për Meryl Streep.
Megjithatë, në të njëjtin vit, në një intervistë për revistën Horizon, aktorja pranoi arsyen e vërtetë pse kishte pranuar rolin:
“E pranova vetëm për para. Më duheshin dhe nuk e fsheh këtë,” u shpreh ajo.
Ishte e qartë se Streep nuk ishte entuziaste për serialin, ashtu si disa kritikë të saj. Pas këtij roli, ajo nuk pranoi më asnjë rol të madh në televizion për gati 25 vjet, deri në interpretimin e saj të shkëlqyer në Angels in America në vitin 2003.