Matt Damon thotë se po jeton një nga periudhat më të veçanta të jetës së tij. Në një intervistë ekskluzive për People, aktori 55-vjeçar rrëfeu se tashmë ndihet se ka hyrë në një “fazë të re”, pasi dy nga katër vajzat e tij janë larguar nga shtëpia për të ndjekur studimet dhe jetën e tyre.
Ylli i filmit The Odyssey pranoi se koha kalon shumë shpejt dhe se tani e vlerëson më shumë çdo moment me familjen.
“Kur fëmijët rriten, kupton se sa e shkurtër është kjo periudhë e jetës. Përpiqem ta shijoj sa më shumë kohën që kemi së bashku,” u shpreh ai.
Damon foli edhe për rrugëtimin e tij në Hollywood, duke e cilësuar karrierën një “udhëtim të jashtëzakonshëm”. Ai kujtoi fillimet me mikun e tij të ngushtë Ben Affleck dhe suksesin e madh që arritën me filmin Good Will Hunting, i cili u solli çmimin Oscar për skenarin më të mirë origjinal.
Aktori tregoi se me kalimin e viteve ka ndryshuar mënyrën se si e sheh jetën. Sot përpiqet të mos shqetësohet për gjërat që nuk mund t’i kontrollojë dhe të përqendrohet te familja, puna që e pasionon dhe aktivitetet bamirëse, përfshirë angazhimin e tij me organizatën Water.org.
Aktualisht, Matt Damon po promovon filmin e ri The Odyssey, me regji të Christopher Nolan, ku interpreton rolin e Odiseut. Aktori e përshkroi xhirimin e filmit si një “ekspeditë”, për shkak të skenave sfiduese dhe xhirimeve në vende të ndryshme të botës.