Ish-anëtari i grupit legjendar The Beatles, Pol Makartni, ka kujtuar një bisedë me Joko Ono, gjatë së cilës ajo i kishte shprehur dyshimet e saj për orientimin seksual të Xhon Lenonit.
Joko Ono, e cila ishte e martuar me Lenonin që nga viti 1969, e telefonoi Makartnin pak kohë pasi muzikanti u vra në vitin 1980 dhe i tha se mendonte se Lenoni “ndoshta ishte homoseksual”.
Megjithatë, Makartni tha se nuk ishte dakord me këtë mendim.
“Në të vërtetë më telefonoi menjëherë pasi Xhoni vdiq dhe më tha: ‘E di, mendoj se Xhoni mund të ketë qenë homoseksual.’ Unë i thashë: ‘Nuk jam i sigurt. Nuk mendoj se ishte, të paktën jo sa kohë që e kam njohur unë’”, tregoi Makartni në një intervistë për Vanity Fair.
Ai shtoi se gjatë viteve ’60 ata shpesh udhëtonin së bashku dhe ndanin edhe dhoma hoteli gjatë turneve, por kurrë nuk kishte ndodhur asgjë e pazakontë.
Makartni u ndal edhe te disa thashetheme të vjetra që u përhapën në vitet ’60, kur Lenoni kishte udhëtuar në Spanjë në vitin 1963 me Brian Epstein, menaxherin e Beatles.
Sipas tij, ai kurrë nuk kishte dëgjuar që të kishte ndodhur diçka dhe e kishte parë atë udhëtim thjesht si pjesë të karakterit dhe humorit të Lenonit.
Duke folur për Joko Ono, Makartni tha se ajo ndoshta kishte bërë këto komente në një moment të vështirë pas humbjes së bashkëshortit.
“Kur unë humba Lindën, thashë disa gjëra të çuditshme. Më vonë e kupton se është thjesht mënyra si njerëzit përballen me dhimbjen”, tha ai.
Joko Ono ka folur edhe më parë për këtë temë. Në një intervistë për Daily Beast në vitin 2015, ajo tha se mendonte se Lenoni kishte interes për marrëdhënie me burra, por se kjo nuk kishte ndodhur kurrë.
“Xhoni dhe unë flisnim shpesh për këtë dhe mendonim se në thelb të gjithë njerëzit janë pak a shumë biseksualë, por shoqëria na mëson të mendojmë ndryshe”, kishte thënë Ono.