Nga vendi i ngjarjes, gazetarja e Radio Vala Rinore po përcjell emocionet dhe atmosferën elektrizuese të natës së parë të Sunny Hill Festival. Mijëra adhurues të muzikës kanë mbushur hapësirën e festivalit në Prishtinë, ku po zhvillohet një spektakël i jashtëzakonshëm. Mbrëmja ka nisur me performanca energjike të artistëve vendorë, ndërsa një pritje të veçantë ka marrë edhe Dhurata Dora, e cila me hitet e saj ka krijuar atmosferën ideale për vazhdimin e natës.
Kulmi i mbrëmjes i takon superyllit amerikan Katy Perry, e cila po mahnit të pranishmit me performancën e saj spektakolare. Artistja ka interpretuar hitet “Roar”, “Teenage Dream”, “Last Friday Night”, ndërsa mijëra fansa po këndojnë çdo këngë në një zë. Efektet vizuale, koreografia dhe energjia në skenë kanë krijuar një atmosferë të paharrueshme. Sipas gazetares së Radio Vala Rinore, emocionet janë në kulm dhe Sunny Hill po konfirmon edhe një herë statusin e tij si një nga festivalet më të mëdha muzikore në rajon.