Këngëtari legjendar Lionel Richie ka qetësuar fansat pas shqetësimeve për gjendjen e tij shëndetësore, duke konfirmuar se është mirë dhe se është rikthyer në skenë pas një ndërprerjeje të shkurtër.
Artisti 77-vjeçar u detyrua të shtynte dy koncertet e turneut të tij “Sing a Song All Night Long” në fund të qershorit, pasi pësoi marramendje gjatë një performance në Minnesota dhe u dërgua në spital për kontrolle si masë paraprake. Mjekët i rekomanduan pushim për disa ditë.
Përmes një postimi në Instagram, Richie falënderoi fansat për mbështetjen e tyre.
“Faleminderit për çdo mesazh, çdo fjalë të mirë dhe gjithë dashurinë tuaj. Jam mirë dhe ju jam mirënjohës të gjithëve,” shkroi ai.
Pas pushimit, Lionel Richie iu rikthye turneut me koncerte në Pittsburgh dhe Detroit, ndërsa u shpreh i lumtur që po performon sërish para publikut. Gjatë një koncerti ai madje bëri shaka me incidentin, duke thënë se për një moment kishte frikësuar jo vetëm fansat, por edhe veten.
Datat e reja për koncertet e shtyra në Chicago dhe Columbus pritet të njoftohen së shpejti.