Sheqeri i bardhë shpesh paraqitet si “armiku kryesor i shëndetit”, por ekspertët theksojnë se në sasi të vogla dhe në situata të caktuara ai mund të jetë zgjedhje më e mirë se ëmbëlsuesit artificialë. Glukoza nga sheqeri i bardhë është burim natyral energjie që trupi e njeh dhe e përdor menjëherë. Kjo është veçanërisht e dobishme tek njerëzit e lodhur, sportistët, personat me ushqyerje të pamjaftueshme, si dhe tek ata që kanë ndjeshmëri ndaj ëmbëlsuesve artificialë, të cilët mund të shkaktojnë fryrje, dhimbje koke apo shqetësime në tretje.
Nga ana tjetër, ëmbëlsuesit artificialë nuk përmbajnë kalori, por mund të ngarkojnë mëlçinë, sidomos te personat që përdorin medikamente, kanë infeksione apo funksion të dobët të saj. Prandaj, përdorimi i sheqerit në sasi të moderuara mund të jetë më i sigurt në disa raste, përfshirë ruajtjen e ekuilibrit psikologjik – pasi shmangia ekstreme e tij shpesh çon në stres dhe faj. Çelësi mbetet moderimi: një ushqim i balancuar me proteina, fibra, fruta, perime dhe yndyra të shëndetshme e lejon sheqerin të jetë pjesë normale e dietës, pa dëmtuar shëndetin.