Ditët e nxehta shpesh na bëjnë të kërkojmë akullore, ëmbëlsira të freskëta apo pije të ftohta, por teprimi me sheqer mund të lodhë organizmin dhe të ndikojë negativisht në shëndet. Temperaturat e larta tashmë e vështirësojnë punën e trupit, ndërsa sheqeri i tepërt rrit rrezikun për dehidrim, luhatje të glicemisë dhe oreks të shtuar për më shumë ëmbëlsira. Ekspertët rekomandojnë që të rriturit të mos konsumojnë më shumë se 25 gramë sheqer të shtuar në ditë, ndërsa fëmijët edhe më pak.
Për të shijuar verën në mënyrë të shëndetshme, zgjidhni alternativa natyrale si frutat e freskëta të stinës (shalqi, pjeshkë, boronica, fiq), akulloret e bëra në shtëpi me kos dhe fruta, puding chia ose çokollatë të zezë në sasi të vogla. Uji i ftohtë dhe lëvizja janë mënyrat më të mira për t’u freskuar, ndërsa ëmbëlsirat le t’i përdorim me masë dhe jo si mjet për të mposhtur vapën apo mërzinë.