Në gjithë Kinën po ndërtohen qytete dhe fshatra të reja që duken sikur janë mijëra vjeç, edhe pse në të vërtetë janë krijuar nga e para. Të njohura si projekte të “imitimit historik”, këto destinacione janë projektuar me rrugica me kalldrëm, pallate, ura dhe ndërtesa në stilin e dinastive të lashta, duke tërhequr miliona vizitorë që kërkojnë një përvojë kulturore dhe fotografi mbresëlënëse.
Edhe pse nuk janë monumente autentike, shumica e turistëve thonë se kjo nuk ua zbeh përvojën, pasi i vizitojnë për atmosferën, arkitekturën dhe eksperiencat interaktive. Ekspertët e turizmit shpjegojnë se këto vende u përgjigjen kërkesave të vizitorëve për përvoja gjithëpërfshirëse, ndërsa janë kthyer në një nga trendet më të reja të turizmit në Kinë.