Frigoriferi e ngadalëson shumimin e baktereve, por nuk e ndalon plotësisht. Për këtë arsye, disa ushqime të gatuara mund të mos jenë më të sigurta për konsum edhe pas vetëm 48 orësh. Kujdes i veçantë duhet treguar me mishin dhe produktet e detit që nuk janë gatuar plotësisht, si dhe me sallatat dhe perimet me gjethe të prera, ku lagështia mund të favorizojë zhvillimin e mikroorganizmave.
Në këtë grup përfshihen edhe orizi dhe makaronat e gatuara. Nëse qëndrojnë për një kohë të gjatë në temperaturë dhome, mund të zhvillohet bakteria Bacillus cereus, e cila mund të prodhojë toksina që shkaktojnë të vjella dhe diarre. Edhe supat, salcat dhe gjellat e përgatitura në sasi të mëdha kërkojnë kujdes, pasi ftohja e ngadalshme mund të krijojë kushte të përshtatshme për shumimin e baktereve. Ekspertët këshillojnë që ushqimi të ndahet në enë më të vogla dhe të vendoset sa më shpejt në frigorifer.