Aktori i njohur Kelsey Grammer ka kritikuar tendencën e Hollywood-it për të ndryshuar ngjarjet historike dhe veprat klasike, duke thënë se kjo qasje po bëhet “e lodhshme” për publikun.
Ylli i serialit legjendar “Frasier” foli në podcastin “The Katie Miller Podcast”, ku u pyet për adaptimet e fundit të filmave klasikë. Edhe pse pranoi se nuk e ka parë ende versionin e ri të “The Odyssey”, ai tha se shpesh ndien se disa filma përpiqen tepër të përshtatin historinë me këndvështrimet e sotme.
“Ka raste kur mesazhi të godet në kokë aq fort, sa bëhet paksa i lodhshëm,” u shpreh Grammer.
Sipas tij, filmat duhet të tregojnë më shumë respekt për saktësinë historike dhe kulturore. Ai theksoi se, për shembull, Anglia e vjetër nuk ishte aq shumëkulturore sa paraqitet në disa produksione moderne.
“Historia dhe rëndësia kulturore duhet të respektohen,” tha aktori.
Gjatë bisedës u përmendën edhe disa filma që kanë nxitur debate vitet e fundit, si “The Little Mermaid”, “Snow White”, “Cleopatra” dhe “The Odyssey”. Grammer argumentoi se kur studiot përpiqen t’u imponojnë shikuesve një këndvështrim të caktuar, rezultatet shpesh nuk janë të suksesshme në arkë.
“Hollywood-i nuk është shumë i zoti t’u tregojë njerëzve çfarë duhet të shohin, sepse atëherë filmat dështojnë,” u shpreh ai.
Megjithatë, aktori shtoi se beson se industria do të korrigjojë gradualisht kursin e saj, pasi dështimet e njëpasnjëshme financiare i detyrojnë studiot të rishqyrtojnë qasjen e tyre ndaj adaptimeve të veprave klasike.