Një trend i ri në rrjetet sociale, ku përdoruesit ngarkojnë fotot e tyre për t’i shndërruar në karikatura të krijuara nga inteligjenca artificiale, po përhapet me shpejtësi. Por, pas argëtimit fshihet një rrezik i madh: përdoruesit po zbulojnë pa vetëdije të dhëna të ndjeshme biometrike dhe informacion personal, i cili mund të keqpërdoret në të ardhmen. Një fotografi e vetme mund të zbulojë profesionin, vendin e punës, dokumente në sfond apo elemente të ambientit, duke krijuar një profil të plotë dixhital të personit.
Rreziqet shkojnë nga vjedhja e identitetit dhe krijimi i profileve të rreme, deri te përdorimi i imazheve për deepfake, një formë mashtrimi që po përhapet gjithnjë e më shumë online. Përdoruesit duhet të jenë të vetëdijshëm se çdo foto e ngarkuar në inteligjencë artificiale mund të mbetet përgjithmonë në qarkullim, ndërsa abuzimet janë të vështira për t’u kontrolluar.