Një kardiolog britanik paralajmëron se orët e para të mëngjesit, nga ora 06:00 deri në 10:00, janë periudha kur zemra përballet me ngarkesën më të madhe dhe rreziku për sulm në zemër rritet ndjeshëm.
Sipas Francesco Lo Monaco, gjatë këtyre orëve organizmi kalon nëpër disa ndryshime fiziologjike: gjaku bëhet më “ngjitës”, arteriet ngushtohen dhe niveli i kortizolit rritet shpejt pas zgjimit. Këto procese mund të jenë veçanërisht të rrezikshme për personat me tension të lartë, stres kronik ose probleme me gjumin.
Eksperti paralajmëron se edhe zgjimi i menjëhershëm nga alarmi mund të krijojë stres shtesë për zemrën. Për këtë arsye rekomandohet zgjimi gradual, shmangia e nxitimit në mëngjes dhe evitimi i ushtrimeve intensive menjëherë pas zgjimit.
Ai thekson se gjumi cilësor, rutina e rregullt dhe monitorimi i tensionit të gjakut mund të ndihmojnë në mbrojtjen e shëndetit të zemrës.