Aktorja kanadeze Catherine O’Hara, e njohur nga publiku botëror për rolin e nënës së Kevin-it në filmat klasikë “Home Alone” dhe për interpretimin brilant në serinë “Schitt’s Creek”, ka ndërruar jetë në moshën 71-vjeçare. Lajmin e konfirmoi menaxheri i saj për revistën Variety, pa bërë të ditur shkakun e vdekjes. O’Hara, një figurë ikonike e humorit dhe kinemasë, nisi karrierën mbi pesë dekada më parë në komedinë kanadeze “Second City Television”, për të cilën fitoi edhe çmimin e saj të parë Emmy.
Gjatë viteve, ajo u shqua në filma si “Beetlejuice”, “After Hours” dhe dy pjesët e para të “Home Alone”, si dhe dha zërin e saj në animacione të njohura si “The Nightmare Before Christmas”. Në dekadën e fundit, O’Hara përjetoi një ringjallje të jashtëzakonshme të karrierës me rolin e Moira Rose në serinë “Schitt’s Creek”, që e shndërroi në një ikonë të re të komedisë televizive. Vdekja e saj lë pas një trashëgimi të madhe artistike dhe një kontribut të pashlyeshëm në botën e filmit dhe humorit.