Qendra Klinike Stomatologjike Universitare e Kosovës (QKSUK), një institucion i njohur për ofrimin e shërbimeve stomatologjike, ka kaluar në një situatë të paprecedentë që ka ngritur shqetësime serioze mbi funksionalitetin dhe efikasitetin e saj. Për më shumë se 210 ditë, janë kryer vetëm dy implante dentare, një statistikë alarmante që tregon një mungesë të theksuar të efikasitetit dhe përkushtimit ndaj pacientëve.
Kjo situatë ka shkaktuar shqetësime të mëdha dhe ka ngritur pyetje mbi arsyet që qëndrojnë pas këtij numri kaq të ulët të implantimeve të kryera, për më shumë se 210 ditë. A është fjala për mungesë të materialeve të nevojshme, staf të pamjaftueshëm, apo problemeve të tjera organizative brenda QKSUK? Çfarë ka ndodhur me proceset e brendshme që kanë çuar në këtë situatë kaotike?
Mediumi Kallxo.com gjithashtu ka raportuar për këtë çështje, duke theksuar se rikthimi i shërbimit të vendosjes së implanteve dentare në Qendrën Klinike Stomatologjike Universitare të Kosovës (QKSUK) nuk doli aq i suksesshëm e me çmim të përballueshëm, siç ishte promovuar.
Në një kohë kur shërbimet mjekësore duhet të jenë më të disponueshme dhe më efikase se kurrë, kjo situatë në QKSUK është një goditje e rëndë për sistemin shëndetësor të Kosovës. Me te drejte kërkohet një hetim me i thellë mbi arsyet që kanë çuar në këtë mungesë të madhe të implantimeve dhe zgjidhje të menjëhershme për të rikthyer funksionalitetin e plotë të këtij institucioni të rëndësishëm (QKSUK).
Kjo situatë kërkon ndërhyrje të menjëhershme për të siguruar që Qendra Klinike Stomatologjike Universitare të mund t’i kthehet detyrës së saj themelore: ofrimit të i kujdesit stomatologjik të nivelit më të lartë për të gjithë ata që kanë nevojë.
A është koha për ndryshime të mëdha në këtë institucion? Kjo është pyetja që po shtrohet sot dhe përgjigjet nuk mund të presin. Kosova meriton më shumë nga sistemi i saj shëndetësor dhe është koha që përgjegjësit të japin llogari për këtë situatë të papranueshme.
