Aktorja irlandeze Jessie Buckley fitoi çmimin Oscar për Aktoren më të Mirë në ceremoninë e 98-të të Akademisë për rolin në filmin “Hamnet”. Me këtë fitore, ajo u bë aktorja e parë nga Irlanda që fiton Oscar për rolin kryesor femëror.
Në momentin e marrjes së çmimit, 36-vjeçarja mbajti një fjalim shumë emocional, ku falënderoi familjen e saj dhe i dërgoi një mesazh të veçantë bashkëshortit.
“Fred, të dua shumë. Je një baba i jashtëzakonshëm dhe shoku im më i mirë. Dua të kem edhe 20.000 fëmijë me ty”, tha ajo duke shkaktuar reagime dhe buzëqeshje në sallë.
Aktorja përmendi edhe vajzën e tyre të vogël, Isla, e cila është vetëm tetë muajshe. “Ajo nuk e ka idenë çfarë po ndodh, ndoshta vetëm ëndërron për qumësht por kjo është një moment i madh. Të dua dhe më pëlqen të jem mamaja jote”, tha Buckley.
Buckley është e martuar që nga viti 2023 me Fredin, një specialist i shëndetit mendor. Çifti e mban jetën private larg vëmendjes së mediave dhe vajza e tyre lindi në vjeshtën e vitit 2025.
Filmi “Hamnet”, i drejtuar nga Chloé Zhao, është një adaptim i romanit të Maggie O’Farrell dhe tregon një histori të imagjinuar për jetën e familjes së William Shakespeare. Në film, Buckley interpreton Agnes, bashkëshorten e dramaturgut, e cila përballet me humbjen tragjike të djalit të tyre Hamnet, një ngjarje që në film shërben si frymëzim për veprën e famshme “Hamlet”.