Aktorja e njohur Jane Seymour ka zbuluar se sekreti i saj për t’u dukur mirë në moshën 75-vjeçare është shumë më i thjeshtë sesa mendojnë shumica e njerëzve: asnjë procedurë estetike invazive.
“Ky është rezultati. Pa lazer, pa fillerë”, tha Seymour gjatë një paraqitjeje të fundit publike, duke shtuar se nuk përpiqet të duket 30 vjeçe. “Ndoshta 60 do të ishte mirë,” u shpreh ajo me humor.
Ylli i serialit “Dr. Quinn, Medicine Woman” tha se për të është e rëndësishme që fytyra të ruajë lëvizshmërinë natyrale, pasi puna e saj si aktore kërkon shprehje autentike të emocioneve. Për këtë arsye, ajo ka zgjedhur të plaket natyrshëm.
Seymour gjithashtu theksoi se ndihet më e lumtur se kurrë më parë. Ajo vazhdon të jetë aktive në karrierë me sezonin e pestë të serialit “Harry Wild”, po përgatitet për një film të ri në Australi dhe së fundmi ka prezantuar një ekspozitë personale me piktura në akuarel.
Për aktoren, plakja nuk është diçka për t’u luftuar, por një proces që duhet pranuar me vetëbesim dhe pozitivitet. “Jam e lumtur aty ku jam në jetë,” është mesazhi që ajo vazhdon të përcjellë.