Instagram po sjell veçori të reja, duke përfshirë mundësinë e përkthimit të mesazheve në 99 gjuhë, opsionin për dërgimin e mesazheve në një kohë të caktuar deri në 29 ditë më vonë dhe shumë të tjera.
Përveç këtyre, platforma po prezanton mënyra të reja për ndarjen e muzikës, mundësinë për të fiksuar deri në tre biseda në krye të DM-ve, si dhe QR Code për bisedat në grup.
“Me funksionin e ri të përkthimit të mesazheve të Instagramit, mund të komunikoni lehtësisht në mbarë botën pa u shqetësuar për barrierat gjuhësore. Pavarësisht nëse dëshironi të lidheni me të afërmit në Korenë e Jugut pas një kohe të gjatë ose me mikun tuaj më të mirë në Spanjë, tani mund të përktheni mesazhet e tyre direkt në DM-të tuaja”, thuhet në njoftimin e kompanisë.
Për të përkthyer një mesazh në një bisedë, thjesht mbani të shtypur mesazhin që është dërguar ose pranuar në një gjuhë tjetër dhe më pas klikoni “përkthe” (translate). Mesazhi i përkthyer do të shfaqet menjëherë poshtë mesazhit origjinal në bisedën tuaj, shpjegon Instagram.